Назарбаев Университетінде NU Impact Foundation бастамасымен жүзеге асырылған мәдени алмасу бағдарламасының қорытынды іс-шарасы — NU GLOBAL форумы өтті. Форум мәдениетаралық диалогты нығайтуға, кәсіби байланыстарды дамытуға және түрлі елдер мен мәдениеттер өкілдері арасында тәжірибе алмасуға бағытталған ауқымды бағдарламаның нәтижелерін қорытындылады.
Жаз бойы бастама қатысушылары бірқатар іс-шараларға тартылды. Олардың қатарында мәдениетаралық әлеуметтік жобаларға арналған гранттар байқауы, Қазақстанның төрт өңірін қамтыған білім беру сапары, сондай-ақ спорттық және квест-күндер болды. Бұл белсенділіктер қатысушыларға елдің мәдени және әлеуметтік контекстін тереңірек танып қана қоймай, NU халықаралық қауымдастығы аясында тұрақты горизонталды байланыстар орнатуға мүмкіндік берді.
NU GLOBAL форумы еркін қарым-қатынас пен идея алмасу алаңына айналды. Іс-шара бағдарламасында іскерлік баяндамалар, Назарбаев Университетінің студенттік клубтарының шығармашылық қойылымдары, интерактивті AI-фотозоналар және лотерея ұсынылды. Әрбір қатысушының мәдени және тілдік ерекшеліктеріне қарамастан ортақ байланыс тауып, достық әрі кәсіби қарым-қатынастар орната алуына жағдай жасауға ерекше назар аударылды.
Бүгінде Назарбаев Университетінде әлемнің 35 елінен келген студенттер білім алуда, ал NU GLOBAL ашық, көпұлтты және өзара байланысты университеттік қауымдастықты қалыптастыруда маңызды рөл атқарып келеді. Форумға халықаралық және қазақстандық студенттермен қатар дипломатиялық миссиялар мен даму институттарының өкілдері қатысып, мәдениетаралық өзара іс-қимыл мен халықаралық ынтымақтастықты дамытуға бағытталған бастамаларға деген жоғары қызығушылықты көрсетті.
