Өnergy Creative Hub командасы Байқоңырға барып, ғарыш саласының өкілдерімен және «Гагарин стартында» орналасқан музей ұжымымен бірлескен жобаларды талқылады. Сапардың негізгі мақсаты — студенттік жобаларды университет кампусынан тыс ортада дамыту, жаңа серіктестермен байланыс орнату және ғылым, технология мен өнерді біріктіретін шығармашылық бастамаларға жаңа мүмкіндіктер ашу.
Өnergy Creative Hub NU Impact Foundation экожүйесі аясында дамып, ғылым, технология және өнер тоғысындағы жобаларды жүзеге асыруға мүмкіндік береді.
Сапардың маңызды бағыттарының бірі — Art&Tech Lab командасының тарихи «Гагарин стартындағы» музей ұжымымен кездесуі болды. Зертхана музей кеңістігіне арналған цифрлық және мультимедиялық шешімдер саласындағы тәжірибесімен бөлісіп, оларды болашақ экспозицияға енгізу мүмкіндіктерін талқылады.
Art&Tech Lab визуалды өнер, инженерия және цифрлық технологиялар бағыттарын біріктіре отырып, мәдени мұраны заманауи форматта таныстыруға арналған шешімдер әзірлейді. Олардың қатарында цифрлық модельдер, интерактивті экспонаттар және мультимедиялық форматтар бар. Алдағы ынтымақтастық аясында зертхананың әзірлемелері музей кеңістігінің бір бөлігіне айналып, Байқоңыр тарихын заманауи технологиялар арқылы жаңа қырынан көрсетуге мүмкіндік береді.
Сапар барысында CinemArt Lab-тың генеративті жасанды интеллект көмегімен контент жасау бағытындағы тәжірибесі де таныстырылды. Сол жобалардың бірі — NU студенттерінің университеттегі өмірі туралы ғылыми-фантастикалық «Генезис» сериалының алғашқы бөлімі. Оқиғасы Байқоңырда өрбитін сериалдың барлық визуалды контентін NU студенттері генеративті жасанды интеллект көмегімен жасаған. Жоба AI технологияларының заманауи аудиовизуалды өндірістегі мүмкіндіктерін көрсетеді.
Жобаның көрсетіліміне Қазақстанның аэроғарыш саласының мамандары қатысты. Олар үшін ғарыш — кәсіби қызметінің тікелей бір бөлігі. Сала өкілдерімен болған пікір алмасу жобаны нақты аэроғарыштық тәжірибе тұрғысынан қарастыруға, сондай-ақ ғарыш тақырыбына арналған болашақ медиа және мәдени жобаларда AI көмегімен жасалған контентті қолдану мүмкіндіктерін талқылауға мүмкіндік берді.